Ливерпул заврши со ангажирање на нови фудбалери во овој преоден рок, тврди менаџерот на англискиот шампион Јирген Клоп. Германецот смета дека Тијаго Алкантара, Диого Жота и Костас Цимикас даваат доволна длабочина во составот, а нови засилувања би можело да има само при непредвидена серија повреди во наредните денови.
Во моментов, Клоп има проблеми со одбраната, повредени се Жоел Матип и Џо Гомес, а Фабињо не се снајде најдобро како партнер на Вирџил ван Дајк. Друга опција за Клоп е тинејџерот Рис Вилијамс.
„Не очекувам нешто драстично. Имаме добра длабочина. И Фабињо е корисен на тој дел од теренот. Тројца ни се повредија за неколку дена и тоа не е пријатно, но вакви работи не се коригираат со трансфери. Ако не се случи некоја голема трагедија во наредните неколку дена, мислам дека не е потребно да купиме некого“, изјави Клоп, кој не сакаше да коментира дали Ливерпул некого ќе продаде до крајот на преодниот рок на 6 октомври.
