Возачот на Дукати, Хорхе Лоренцо, поради повреда на левата рака ги пропушти последните две трки од овогодишниот шампионат во Мото ГП. Шпанецот не возеше во Тајланд и Јапонија, а сега ќе биде принуден да отсуствува и од борбата за Големата награда на Австралија, трката која е закажана за во недела, 28-ми октомври.
На Лоренцо пред два дена му беше извршена операција на раката во Барселона, а цели кон целосно закрепнување за околу три недели, кога Мото ГП шампионатот продолжува во Малезија, трка која ќе се одржи на почетокот од ноември. Сепак, ако закрепнувањето не оди според планот, возачот на Дукати ќе биде подготвен дури за последната трка од оваа сезона, која ќе се одржи во Валенсија.
Шампионатот веќе е одлучен, откако Марк Маркес изминатиов викенд победи на патеката „Мотеги“ во Јапонија, така што ја одбрани светската титула, односно ја освои петтата титула на Мото ГП во својата кариера.
