Лош старт на првиот Гренд слем турнир во сезоната имаа дури три поранешни Гренд слем шампионки, што ретко се случиува на големите тениски настани.
По елиминацијата на Венус Вилијамс и Саманта Стосур, првиот ден на Австралија опен беше кобен и за Слоун Стивенс. Американката попладнево загуби од Шуаи Жанг со 6:2, 5:7, 2:6 и е третата поранешна шампионка на еден од четирите Гренд слем турнири.
https://twitter.com/AustralianOpen/status/1219235177739714561?s=20
Најтрофејната, секако, е Венус Вилијамс со вкупно 7 пехари од четирите најценети тениски турнири, но ниту еден во Мелбурн. И годинава ветеранката не успеа, па сега шансите за подвиг и се минимални бидејќи веќе има 39 години. Постарата од сестрите Вилијамс загуби убедливо со 6:7, 3:6 од 15-годишната сонародничка Кори Гоф.
По неа испадна и Сем Стосур со пораз од 1:6, 4:6 против Кети Мекнали, а дебаклот на шампионките го комплетираше Стивенс со неуспех против Шуаи Женг.
Кај мажите најголемото изненадување го приреди Унгарецот Мартон Фуксович со елиминација на 13-тиот носител Денис Шаповалов. Фуксович победи со 6:3, 6:7, 6:1, 7:6.
Останатите фаворити кои настапија на првиот ден од Отвореното првенство на Австралија славеа победи, предводени од актуелниот шампион Новак Ѓоковиќ. Тој го победи Штруф со 3:1 во сетови, а претходно пласман во второто коло обезбедија и Роџер Федерер со триумф од 3:0 против Џонсон, Циципас со идентичен триумф против Карузо и Димитров кој славеше со 3:1 против Лондеро.
