Македонската репрезентација за кошаркари до 20 години, загуби од Шведска во второто коло на Европското првенство Б дивизија, кое се одржува во Грузија. Нашите таленти после вчерашната убедлива победа над Австрија, денеска беа поразени од шведските врсници со 90-92.
Кобна беше првата четвртина која Шведска ја доби со 29-14. Избраниците на селекторот Никола Василев играа добро во вториот и последниот квартал, но тоа не беше доволно за победа со пресврт.
При 79-84, Миловановиќ утна шут за три поени, а Шведска погоди тројка во следниот напад за 87-79 и со тоа на една и пол минута до крај, практично беше одлучен победникот, иако македонските кошаркари се трудеа до последен момент да ја стопат негативата.
Хот со 22 поени беше најефикасен во македонската селекција, а двоцифрени беа и Миловановиќ со 16, Савичевиќ со 15 и Андоноски со 13 поени.
Утре, Македонија игра со Косово, по што ќе следува клучниот меч со домашната Грузија.
