Џенаро Гатузо го отстранил Ирвинг Лозано од тренинг поради недоволно залагање, а Мексиканецот е казнет и тренирал одвоено од соиграчите.
Мексиканецот го налутил популарниот Рино и главната забелешка е дека нема напредок кај ланското скапо засилување на Наполи.
Лозано пристигна минатото лето во Неапол, речиси истовремено со Елиф Елмас, а италијанскиот шампион го чинеше 50 милиони евра што беа уплатени на сметката на ПСВ Ајндховен.Тоа е рекорден трансфер во клупската историја на холандскиот гигант.
Иако беше најавуван како големо засилување, Лозано досега одигра само 136 минути за Наполи и не покажа речиси ништо од раскошниот талент.
Дојде во Неапол како прв стрелец на ПСВ во сезона во која постигна 17 гола и имаше 8 асистенции и потпиша петгодишен договор, но многу малку игра, а сега според казната од Гатузо, слабо се залага и на тренинзите.
Наполи утре од 21 часот на „Олимпико“ во Рим го игра финалето на Италијанскиот куп против Јувентус, а Лозано веројатно нема да биде во составот.
