Реал Мадрид објави дека простувањето со Лукас Васкес, чиј договор со клубот истече и нема да биде продолжен, ќе се случи утре, на специјална церемонија во базата на Кралевите, Валдебебас во Мадрид.
Лукас Васкес се приклучи на Реал Мадрид во 2007 година, кога имаше само 16 години. Тој помина низ академијата, беше во Ц и Б тимовите на Реал, а по една сезона на позајмица во Еспањол. Своето деби за првиот тим на Реал Мадрид го имаше во септември 2015 година. Оттогаш тој има 402 настапи во 10 сезони, станувајќи еден од најтрофејните играчи на Реал со 23 трофеи, од кои 5 во Лигата на шампионите.
По 18 години во Реал, 34-годишниот Лукас, кој играше како десно крило подоцна и десен бек, со емотивна видеопорака на социјалните мрежи се прости од фановите.
„Драги Мадридисти! Поминаа речиси две децении откако пристигнав во Валдебебас на 16-годишна возраст, полн со соништа и очекувања да го носам овој дрес. Секој чекор по патот беше подарок за мене и со текот на времето, Мадрид стана мој дом.“
Поминавме незаборавни вечери заедно, прославивме 23 титули и создадовме спомени што ќе останат со мене засекогаш. Од дното на моето срце, ви благодарам вам, на претседателот, на управниот одбор, на персоналот, на тренерите, на соиграчите и најмногу од сè, на навивачите кои секогаш ме поттикнуваа да го дадам својот максимум.
Денес, по повеќе од 400 натпревари, време е да се збогувам со клубот на мојот живот. Но, си заминувам со мир во душата, знаејќи дека дадов сè од себе. Отсекогаш сум бил свесен за одговорноста и привилегијата да го носам овој амблем.
Уживав во секој натпревар, тренинг, патување, и ако ова патување ме научи нешто, тоа е дека никој никогаш не треба да ти кажува дека не можеш да постигнеш нешто.
Можеби го напуштам Реал Мадрид, но Реал Мадрид никогаш нема да ме напушти. Каде и да одам, ќе бидам горд што ќе кажам дека имав чест да играм за најголемиот клуб во светот. Ви благодарам за најпрекрасното патување во мојот живот. Напред, Мадрид!“
