Формула 1 и ФИА го потврдија тркачкиот календар за сезоната 2026, што ќе го означи почетокот на нова техничка ера со целосно редизајнирани болиди и погонски единици.
Сезоната повторно ќе започне со Големата награда на Австралија, која исто така ја отвори сезоната во 2025 година, потврдувајќи го статусот на Мелбурн како идеално место за почеток на сезоната во Ф1.
Само една недела подоцна, циркусот на Ф1 се сели во Кина, додека Големата награда на Јапонија ќе следи на крајот на март. Потоа е двојна програмата на Блискиот Исток, со трки во Бахреин и Саудиска Арабија, кои се одложени поради Рамазан и ќе се одржат кон средината на април.
Најголемата промена во календарот за 2026 година е укинувањето на трката во Имола, додека Мадрид ќе биде домаќин на Ф1 за првпат, заменувајќи ја класичната шпанска ГН во Барселона.
И покрај промените, бројот на трки останува ист – 24, колку што имаше минатата сезона.
Канадското Гран при е поместено за крајот на мај за да се намали логистичкиот притисок врз распоредот и да се овозможи непречена интеграција на европскиот дел од сезоната. Монтреал на тој начин ќе биде независна трка, исто како и Големата награда на Мајами, која останува во мај.
Европскиот дел од сезоната започнува на 7 јуни со Големата награда на Монако, а завршува на 13 септември со нова трка во Мадрид, на патека позната под работното име „Мадринг“.
Календарот за 2026 година вклучува едно тројно коло помалку отколку во претходните години – остануваат само две, а обете се наоѓаат кон крајот на сезоната.
Првата е во октомври и вклучува Гран при на САД во Остин, Мексико и Бразил.
Втората тројна завршница го вклучува спектаклот во Лас Вегас, потоа трката во Катар и традиционалното финале во Абу Даби, кое е закажано за 6 декември.
„Годината 2026 претставува нова ера за Формула 1, во која ќе бидеме сведоци на сосема нови правила, автомобили и мотори напојувани со 100% одржливо гориво. Исклучително сме возбудени што Мадрид се приклучува на календарот и што ќе го видиме влегувањето на големи автомобилски брендови, како што се „Ауди“, „Кадилак“ и „Форд“. Ќе биде незаборавна сезона, со 24 фантастични трки низ целиот свет, каде што најдобрите возачи ќе дадат сè од себе во битка тркало на тркало пред милиони фанови“, изјави претседателот на Ф1, Стефано Доменикали.
