Нема крај на лошите игри на најскапиот дефанзивец во историјата на фудбалот, Хари Мегваер. На последниот меч во дресот на англиската репрезентација Мегваер си постигна автогол, но, за негова среќа, Гордиот Албион победи со 3:1 на контролниот меч на гости кај Шкотска.
По најновиот автогол на Мегваер, и тоа постигнат по само 21-вата минута, поминати на теренот, англиските навивачи, но и аналитичари и новинари продолжија со жестоките критики на сметка на дефанзивецот. Овие критики не може веќе да ги трпи мајката на Мегваер, Зое, која реши да се „јави“ преку социјалните мрежи.
„Читајќи ги и слушајќи ги негативните коментари на аналитичарите и новинарите кон мојот син, можам да кажам дека е срамота, затоа што тој секогаш го давал најдоброто во репрезентативниот дрес. Разбирам дека во фудбалот често има добри и лоши работи, но ова што му го прават на Хари ги поминува сите граници. Не е во ред ова низ што сè поминува, не би му го посакал ова на ниту еден родител. Хари има огромно срце и среќа што е ментално силен и ова може да го поднесе. Некој друг сигурно не би можел. Не би му посакал никому да биде вака малтретиран“, беше пораката што ја испрати Зое преку социјалните мрежи.
