Женската ракометна репрезентација на Македонија со очекуван пораз од Шведска го започна настапот на Европското првенство во Дебрецин. Нашите ракометарки загубија со 28-18, иако поразот можеше да биде и далеку поубедлив.
Сепак, мечот започна како од соништата за Македонија, откако најпрво поведовме со 1-0, а потоа и со 3-1, но тука застанавме, а противникот со серија од 5-0 дојде до водство од 6-3 и до крајот на мечот не го испушти водството. Нашите девојки се држеа се до 20-тата минута и резултат 9-7, а потоа следуваа 19 минути во кои не постигнавме гол.
Шведска за тие 19 минути направи серија од 11-0 и поведе со 20-7, а на полувремето имаа водство од 15-7. Македонските ракометарки се опуштија во последниот период, па со серија од 4-0 намалија од 26-10 на 26-14 и колку толку го ублажија поразот, кој на крајот беше изразен со десет гола разлика.
Марија Јанкуловска, Ива Младеновска, Јована Кипријановска и Сара Ристовска постигнаа по три гола, додека во победничката екипа и воопшто на натпреварот најефикасна беше Натали Хагман со девет гола.
