Фудбалската репрезентација на Македонија со победа на гости во Лихтенштајн тргна во квалификациите за Светското првенство кое се игра следната година, а утре следува вториот меч, против Велс дома.
Амбициите ни се пласман барем во баражите за СП, а дотаму може да стигнеме на два начина, како втори во квалификациската група или преку Лигата на нациите, што е можеби пореална варијанта во моментов бидејќи седумте топ фаворити во Европа тешко дека нема да бидат први или втори во своите групи во квалификациите.
Кога во моментов би завршиле квалификациите, и оние што уште не почнаа и важат за фаворити би обезбедиле пласман на СП, Македонија би играла бараж и би била во четвртиот шешир при ждрепката, што значи дека би играле на гости во полуфиналето со некој од првиот шешир, а таму во моментов би биле Украина, Турција, Србија и Велс.
Оваа варијанта е многу поповолна за нас од таа што беше во 2022, кога игравме баражи на гости со Италија и Португалија, но квалификациите се долги и има безброј опции.
