Македонската кошаркарска репрезентација вечерва започнува еден нов голем предизвик, го игра првиот меч од претквалификациите за пласман на Евробаскетот. Нашата репрезентација во СРЦ „Кале“ ја пречекува селекцијата на Азербејџан и е во улога на голем фаворит.
Азербејџан има седум порази во последните осум меча. Губеа од Ирска, Косово, Швајцарија, Андора, Малта…, што доволно кажува дека Македонија е во улога на фаворит за триумф.
Селекторот Марјан Илиевски го одреди составот за овој меч, а довербата ја добија: Војдан Стојановски – МЗТ Скопје Аеродром, Андреј Магдевски – МЗТ Скопје Аеродром, Стојан Ѓуроски – Работнички, Андреј Митревски – Пелистер, Лука Стојановски – Пелистер, Виктор Ташовски – ТФТ Скопје, Теодор Симиќ – Кожув, Адем Мекиќ – Бора – Косово, Ваљмир Какруки – Сигал Приштина – Косово, Лејсон Зеќири – Башкими – Косово, Андреј Јакимовски – Тренто – Италија и Омари Мур – Валенсија – Шпанија.
Од Кошаркарската федерација одлучија влезот за овој меч да биде слободен и навивачите да дадат голема поддршка од трибините за Македонија да стигне до триумф.
