Македонската фудбалска репрезентација вечерва ќе ги дознае противниците во новата сезона од Лигата на нациите. Ждрепката ќе биде во Брисел од 18 часот, а нашата репрезентација за првпат е дел од Б сегментот.
Пред шест години, Македонија во Лигата на нациите започна од Д сегментот, но напредуваше и се пласира во Ц сегментот, а откако имаше успешен последен настап, се избори и за место во Б сегментот.
Според распоредот, Македонија ќе биде во последниот четврти барабан од ждрепката за Б сегментот, и тоа заедно со репрезентациите на Шведска, Северна Ирска и Косово. Тоа значи дека овие земји не може да бидат наши противници.
Во првиот барабан се Шкотска, Унгарија, Полска и Израел. Во вториот барабан се селекциите на Швајцарија, Босна и Херцеговина, Австрија и Украина, додека во третиот барабан има место за Словенија, Грузија, Република Ирска и Романија.
Македонија ќе добие по еден ривал од сите три барабани. Од многуте комбинации кои може да се паднат, една од најтешките би била со ривали кои веќе се дел и од Светското првенство 2026.
Тоа значи Македонија од првиот барабан може да ја добие Шкотска, која веќе има мундијалска „виза“. Од вториот барабан на СП 2026 сигурно ќе бидат Швајцарија и Австрија, но со шанси се и Босна и Херцеговина и Украина, кои играат бараж.
Од третиот барабан нема ниедна сигурна учесничка на СП 2026, но Република Ирска и Романија се дел од баражите.
Едноставно, кои и да бидат трите противници, секако дека Македонија ќе биде пред голем предизвик да се обиде да остане во ова силно друштво каде што се националните селекции во Б сегментот.
Новиот македонски селектор Гоце Седлоски пред заминување во Брисел ги кажа своите очекувања пред ждрепката, а тоа може да го прочитате ТУКА.
