Селекциите на фудбалските ѕвезди од Бугарија и Македонија на 27 април во 15 часот на стадионот на Спартак во Варна ќе одиграат хуманитарен меч, а средствата ќе бидат донирани за семејствата на настраданите и повредените во големата трагедија во Кочани.
Ваквиот натпревар ќе се одигра на иницијатива на Фондацијата „Национали 94“ во која членуваат бугарските репрезентативци од Светското првенство во 1994 година, кога нашите источни соседи го постигнаа најголемиот успех со пласманот во полуфиналето.
Селекцијата на ветерани од Македонија ќе биде предводена од Ѓоко Хаџиевски од клупата и од Горан Пандев на теренот, а останатите фудбалери кои ќе настапат дополнително ќе бидат познати. Во составот на Бугарија веќе го потврдија учеството 30-тина фудбалери, а најзвучни се Христо Стоичков, Валери Божинов и Красимир Балаков.
