Ракометната репрезентација на Македонија вечерва ги дозна противниците во квалификациите за пласман ан Европското првенство 2028, а тоа се селекции на Шведска, Грција и Луксембург.
Со оглед дека пласман на континенталниот собир обезбедуваат двете најдобри селекции, како и четири најдобри трети, реално е да очекуваме дека Македонија ќе го продолжи континуитетот на настапите на големите натпреварувања.
Европската ракометна федерација, ЕХФ, го објави и распоредот, па на почетокот од ноември годинава најпрво на домашен терен ќе го пречекаме Луксембург, а потоа ќе ѝ гостуваме на Грција.
Во март следната година ќе одиграме двомеч против првиот фаворит во нашата група, Шведска, а квалификациите завршуваат во мај 2027 година.
Тогаш најпрво ќе му гостуваме на Луксембург, а во последниот меч ќе ја пречекаме селекцијата на јужниот сосед, која се надеваме дека ќе дојде во Македонија да ни го честита пласманот на Европското првенство.
