Македонија тргна со претпоследно место на Зимските младински олимписки игри
Мирко Лазаревски го освои 56. место во супер-велеслалом како прв наш натпреварувач од петте што ќе настапат во Лозана
Мирко Лазаревски го заврши супер-велеслаломот на Зимските младински олимписки игри на претпоследното 56. место, а нов шампион е Швеѓанецот Адам Хофштед.
Нашиот прв претставник од вкупно петмина што ќе се натпреваруваат во Лозана имаше за 8.87 секунди послабо време од победникот.
Трката ја завршија 57 скијачи од вкупно 63 кои се пријавија за супер-велеслаломот. Лазаревски утре од 10.30 часот ќе се натпреварува и во слалом, а тој е единствениот македонски претставник во алпско скијање на Зимските младински олимписки игри.
Во Лозана ќе се натпреваруваат и Анамарија Зафировска и Дарко Крстески во биатлон и Михаела Даноска и Андонаки Костоски во крос-кантри.
