Македонија во Вадуц ќе треба да прекине една лоша традиција кога се работи за стартот на квалификации на СП

Фудбалската репрезентација на Македонија е во Вадуц, каде што утре против домаќинот Лихтенштајн ќе стартува во квалификациите за пласман на Светското првенство во 2026 година. За Македонија ова се осми квалификации за пласман на Мундијалот, а уште не е остварен сонот да бидеме дел од планетарниот собир.

Македонија е голем фаворит против Лихтенштајн, но интересна е традицијата кога се работи за старт во квалификации за СП.

Во претходните седум квалификациски циклуси, една работа е впечатлива. Македонија кога стартувала на домашен терен во квалификации за СП, секогаш победувала. Така беше во квалификациите за СП 1998, кога дома со 3:0 го победивме токму Лихтенштајн. На домашен терен започнувавме и во квалификациите за СП 2006 и СП 2010 кога во Скопје беа победувани Ерменија со 3:0, односно Шкотска со 1:0.

Сепак, проблемот е кога Македонија гостувала на стартот од квалификациите за СП, па во досегашните четири настапи на гости во првиот меч секогаш сме си заминувале поразени.

Во квалификациите за СП 2002 загубивме од Словачка во Братислава со 2:0, на стартот од квалификациите за Мундијалот 2014 загубивме од Хрватска во Загреб со 1:0, а на стартот од СП 2018 во Скадар бевме поразени од Албанија со 2:1. Пораз доживеавме и од Романија на стартот од квалификациите за СП 2022, и тоа со 3:2 во Букурешт.

Сега имаме одлична шанса за првпат да се случи Македонија да започне со победа во едни квалификации за СП, и тоа на гостински терен, Лихтенштајн е наш стар „муштерија“, па утре попладне сè освен победа на Македонија ќе биде големо изненадување.