Репрезентацијата на Македонија за противници во Лигата на нациите ги доби Шкотска, Швајцарија и Словенија. Против Словенија имаме одиграно вкупно седум натпревари, вклучително и првиот официјален на 13 октомври 1993 година, додека против Шкотска сме играле четирипати.
Македонија и Швајцарија никогаш претходно немаат одиграно меѓусебен меч, па сега ќе останат уште четири селекции за да се комплетира т.н. „естонски подвиг“. Токму Естонија е единствената земја од Европа која има одиграно барем по еден натпревар против останатите членки на УЕФА, кои се на број 55.
Швајцарија ќе биде 50-тата земја членка на УЕФА против која ќе одиграме натпревар, па за комплетирање на „естонскиот подвиг“ ќе ни требаат уште натпревари против Франција, Северна Ирска, Грција и Сан Марино.
Можност да се намали оваа бројка ќе имаме во јуни, кога е термин резервиран за пријателски натпревари пред почетокот на Светското првенство, па можеби некоја од овие четири селекции ќе биде наш противник во тој термин на ФИФА.
