Џевдет Шаиноски продолжи во фудбалските води и по успешната кариера како играч, сега е тренер во Данска. Од вчера го презеде кормилото на тамошниот четвртолигаш Херлев.
Популарниот Џеко долг период живее во Данска, а ја прифати понудата да биде кормилар на тимот од предградието на Копенхаген.
Ова му е втор обид да биде шеф на стручен штаб на данска екипа и ќе се обиде да стаса до повисок ранг на натпревари со Херлев.
Шаиноски има 26 настапи за македонската репрезентација, постигна два гола, а особено го паметиме погодокот што го постигна во 1998 година на „Максимир“ против Хрватска во квалификациите за настап на Европското првенство во 2000 година.
Фудбалската кариера ја почна во Тиквеш, потоа блескаше во Вардар, од каде замина во холандскиот прволигаш НЕЦ Најмехен. Оттаму се пресели во Германија во редовите на Хановер, па следеше преселба во Скандинавија, прво во составот на Б 93, а потоа и во Нордсјеланд.
