Македонската женска ракометна репрезентација со голем успех се враќа од Анкара, откако со победата над Словачка од 26-24 го освои првото место на силниот меѓународен турнир. Избраничките на Кристијан Грчевски со две победи и едно реми покажаа одлична форма и заслужено се најдоа на врвот.
Последниот натпревар против Словачка беше најтежок и највозбудлив. Словачките ракометарки започнаа подобро и рано ја презедоа иницијативата, но Македонија брзо се консолидира и се врати во мечот. До полувремето резултатот беше целосно израмнет, 12-12.
Во второто полувреме нашата селекција го крена темпото, го презеде водството и во најголемиот дел од играта контролираше со разлика од три до четири гола. Словачка се обиде да се врати во финишот и дури имаше напад за намалување на само еден гол, но македонските ракометарки одиграа одлично во одбраната и ја обезбедија конечната победа.
Македонија претходно славеше над Турција со 26-29, ремизираше со фаворизираната Словенија (23-23), а со денешниот триумф ги заокружи настапите со прво место и одлична увертира за претстојните предизвици.
