На Македонија ѝ се погоди распоредот на мечеви на Европското првенство, а и испаѓањето по првата фаза на натпревари по групи ја смести меѓу репрезентациите што најмалку патуваа на шампионатот.
Официјално е забележано дека Пандев и соиграчите минаа пат од 1.800 километри за да стигнат до Букурешт, каде што игравме два меча против Австрија и Украина, а потоа и да отпатуваат до Амстердам на дуел со Холандија во последното коло во фазата по групи.
Испаднавме во дебитантскиот настап на големите натпреварувања со три порази, па и тоа е една од причините што сме во Топ-5 селекции што најмалку патуваа на ЕП.
Унгарците се први со минати само 600 километри од Будимпешта до Минхен за мечот со Германците, а останатите два дуели ги играа на свој терен во главниот град.
И Холанѓаните имаа привилегија да ги играат сите три меча дома, во Амстердам во првата фаза, па патуваа само 1.300 километри до Будимпешта за дуелот со Чешка, на кој беа елиминирани во осминафиналето.
Само 100 километри повеќе летаа Шкотите, а Македонија заедно со Германците е во Топ-5 со по 1.800 минати километри.
Рекордер е Швајцарија, селекција која мина 17.000 километри за да игра во Рим, во Баку, во Букурешт и во Санкт Петербург. Зад нив се Шпанците со 14.100 километри и Белгија со 13.200 километри пат на ЕП.
