Манчестер јунајтед на неверојатен начин успеа да го елиминира ПСЖ во осминафиналето од Лигата на шампионите. Избраниците на Оле Гунар Солсјкер славеа со конечни 1-3 на „Паркот на принцовите“ откако гостите постигнаа трет гол во судиското продолжение, и тоа преку пенал, онолку колку што им беше потребно за пласман во следната фаза.
„Светците“ капитулираа иако имаа огромна предност по првиот дуел од 0-2, сепак Јунајтед во свој стил го направи невозможното, иако голема улога одигра и ВАР-технологијата во завршницата.
Иако десеткувани, гостите во Париз дојдоа по изненадување, а само по две минути игра, Лукаку постигнал гол со кој „ѓаволите“ во продолжението играа со многу самодоверба. ПСЖ возврати во 12-тата минута преку Бернат, меѓутоа Јунајтед и по израмнувањето не се предаде.
Точно по половина час игра, при еден обид на Рашфорд да се закани од далечина, Буфон лошо реагираше и ја испушти топката, која ја собра Лукаку и погоди за 1-2. Првото полувреме најави нови „пеколни“ 45 минути, но, за жал, во нив не се виде ниту еден гол.
Пресудна беше 91-вата минута. Далот шутираше од далеку и го погоди Кимпембе во лакотот од десната рака, а Французинот стоеше точно на линијата на шеснаесетникот. Судијата Скомина реагираше по сугестија од ВАР-собата, а по проверката досуди пенал во корист на Манчестер, кој го реализираше Рашфорд.
Вториот меч во којшто играат Порто и Ром, се продолжи уште за 30 минути откако во регуларните 90 резулатот гласеше 2-1 за домаќините. Со оглед на тоа дека и средбата во Рим заврши со идентичен резултат, новиот четвртфиналист од овој пар ќе се знае или по 120 минути, или во пенал-рулет.
За Порто голови постигнаа Соарес (26‘) и Марега (52‘), за Рома беше прецизен Де Роси во 37-та минута од пенал.
