Манчестер Јунајтед бара нов голман во завршницата на летниот преоден рок и веќе стапи во контакт со Астон Вила за Емилијано Мартинез. Аргентинскиот репрезентативец е подготвен да го напушти клубот и да се пресели на „Олд Трафорд“, откако ја промени одлуката да не игра за тим кој не учествува во европските купови.
Приоритет на Јунајтед беше 23-годишниот Сене Ламенс од Антверпен. Англичаните водеа преговори со белгискиот клуб, додека Мартинез се разгледуваше како резервна опција во случај трансферот на Ламенс да пропадне. Сепак, сега Аргентинецот е во преден план, а во спротивна насока во Астон Вила би можел да замине Џејдон Санчо.
Менаџерот на Манчестер јунајтед, Рубен Аморим, има сериозен проблем на голманската позиција. Андре Онана беше повреден, а и не беше на ниво ланската сезона. Турскиот интернационалец Алтај Бајиндир кој сега добива шанса на голот, исто така не е врвно решение.