Капитенот на англиската фудбалска репрезентација, Хари Кејн, вечерва за првпат ќе гостува во родната земја во дрес на странски клуб и може да придонесе за елиминација на англиски клуб од Лигата на шампионите.
Кејн како играч на Баерн има гостување на „Олд Трафорд“ кај Манчестер јунајтед, а интересно е дека ова се двата клуба кои се бореа за неговиот потпис летоска. Баварците беа поумешни, а и платија колку што бараше Тотенхем, па гол-машината заврши кај нив.
Статистиката на Кејн против Јунајтед е загрижувачка за Црвените ѓаволи. На последните пет гостувања на „Олд Трафорд“, Кејн има 4 гола и две асистенции. Последниот меч на Кејн на овој стадион беше во јуни, кога со англиската репрезентација ја декласира Македонија со 7-0. Тогаш Хари даде два гола.
