Македонската фудбалска репрезентација ги прави последните подготовки пред квалификацискиот натпревар за ЕП 2024 против Украина на 16 јуни (петок), на Националната арена „Тодор Проески“ во Скопје.
Јован Манев и Сефер Емини, кои треба да се иднината на македонската репрезентација, ги дадоа своите очекувања за дуелот против Украина.
„Веќе влеговме во последната фаза од подготовките за мечот против Украина. Навистина нè очекуваат многу тешки натпревари. Оптимисти сме, ќе дадеме сè од себе да ги победиме Украинците, фокусирани сме на тој натпревар, но нема да биде лесно. Имаме голема почит кон противникот, Украина е талентиран и одличен тим. Тоа го потврдија и на синоќешниот пријателски натпревар против Германија. Верувам дека ние помладите даваме дополнителен импулс во нашата репрезентација. Се разбира дека имаме голема почит кон поискусните. Тие се наша голема поддршка. Верувам дека заеднички придонесуваме за подобра енергија во тимот. Важно е да ги исполниме задачите од селекторот. Ако тоа го направиме на теренот, убеден сум дека ќе оствариме позитивен резултат“, вели Манев.
Сефер Емини очекува позитивен резултат против Украина за да биде мотивот уште поголем пред гостувањето во Англија.
„Чест е да се биде овде, се трудам да го дадам максимум на секој тренинг. Репрезентацијата е таква што секој треба да даде сè од себе. Сите мораме да бидеме подготвени и да ја чекаме одлуката на селекторот. Пред сè, мора да се фокусираме на натпреварот против Украина, а дури потоа да размислуваме за Англија. Позитивен резултат на првиот меч ќе донесе повеќе верба и самодоверба пред патувањето во Манчестер. Целта е да се одигра најдобриот можен натпревар и да се победи, но фудбалот е непредвидлив. Ако не сте 200 проценти сконцентрирани, секој може да ви ги расипе плановите“, вели Емини.
