Фудбалската репрезентација на Македонија ги продолжува подготовките за претстојните натпревари против Италија и Малта во квалификациите за ЕП 2024 кое ќе се игра во Германија.
Првиот натпревар Македонија ќе го игра в сабота на Националната арена „Тодор Проески“ против Италија, додека три дена подоцна ѝ гостува на Малта.
Младиот 22-годишен дефанзивец на Адана Демирспор, Јован Манев, очекува Црвено-жолтите да го дадат максимумот и ќе сторат сè за да дојдат до позитивен резултат.
„Дојде време сите заедно да ѝ се приклучиме на репрезентацијата. Играме против Италија. Никој не може да ѝ се заканува на Италија, сите знаеме каква репрезентација е. Но, фудбалски е да се надеваш на позитивен резултат и сигурен сум дека сите фудбалери ќе го дадат максимумот и ќе постигнеме позитивен резултат. Останува да се фокусираме на теренот и со позитивни мисли да дојдеме до позитивен резултат.
Последната пресметка меѓу Македонија и Италија заврши со триумф на Црвено-жолтите, и тоа во Палермо. Македонија со голот на Александар Трајковски ги совлада Аѕурите во полуфиналето од баражот за пласман на СП 2022. Манев не верува дека Италијанците ќе бараат одмазда за тој пораз.
„Не верувам во одмазда затоа што ова е фудбал, секој натпревар е нов предизвик и се надевам на позитивен резултат в сабота“, рече Манев.
