Диего Армандо Марадона откри за кого ќе навива во пресрет на вечерашниот дуел меѓу Наполи и Барселона во осминафиналето од ЛШ. Првата пресметка се игра на „Сан Паоло“, кој се очекува да биде исполнет до последното место за спектаклот, а како и милиони фудбалски фанатици низ светот, и големиот Марадона ќе го проследи.
Наполитанците го сметаат за „Бог на фудбалот“, па затоа Марадона вечерва ќе навива за тимот во којшто помина најголем дел од кариерата и освои бројни трофеи, меѓу кои две титули во Серија А и тогашниот Куп на УЕФА.
„Нема сомнежи дека ќе навивам за Наполи, особено во ваков исклучително тежок натпревар. Моето срце е со Наполитанците“, истакна Марадона.
Аргентинецот, кој сега работи како тренер во родната земја, своевремено беше најскап фудбалер во светот, а токму неговиот трансфер за сума од 6,9 милиони евра од Барселона во Наполи во 1984 година беше највреден.
