Челзи со победа над градскиот ривал Тотенхем се врати во првата четворка на премиерлигашката табела. Тренерот на Сините, Енцо Мареска, е задоволен од мечот, но вели дека не е приоритет да играат во Лигата на шампионите, туку екипата да напредува.
„Резултатот е од големо значење за нас. Се приближува крајот на сезоната, а ние се трудиме да играме како што сакаме. На моменти бевме одлични. Не ми се допаѓа кога вака завршуваат натпреварите, но ако сакаме да бидеме голем тим, тогаш да победуваме и на овој начин. Генерално, натпреварот беше добар. Заслужено победивме. Создадовме многу шанси, а во последните десетина минути покажавме дух, труд и сплотеност. Сакаме да се пласираме во Лигата на шампионите, но поважно ми е да ја гледам екипата како напредува од ден во ден и тоа навистина се случува“, рече Мареска.
Во последните осум кола од Премиер лигата ќе се води вистинска битка за четвртата позиција на табелата и пласманот во Лигата на шампионите. Во пол-позиција е Челзи со 52 бода, пред Манчестер сити со 51, Њукасл со 50, Астон вила со 48 и Брајтон со 47 поени.
