Фудбалската федерација на Словенија денес потврди дека Матјаж Кек повеќе не е селектор на националниот тим.
Според соопштението, неговиот договор истекол на 30 ноември.
„Претседателот на Фудбалската федерација на Словенија и Матјаж Кек по заеднички разговор одлучија да ја прекинат соработката по седум години многу добра и коректна работа, која донесе успех во квалификациите за Европското првенство и пласман во осминафиналето“, стои во соопштението.
Федерацијата му се заблагодари на Кек за вложениот труд и достигнувањата кои, како што се додава, ќе останат запишани во историјата на словенечкиот фудбал.
„По подолго време, словенечката репрезентација повторно беше дел од европската фудбалска сцена и се најде меѓу најдобрите тимови. Особено ја цениме поврзаноста со навивачите во овој период и начинот на којшто заедно создадоа незаборавна атмосфера на домашните стадиони, како и во Германија“, се додава во соопштението.
Следниот натпревар на словенечкиот национален тим е закажан за 23 март 2026 година, па Федерацијата најави дека ќе го спроведе изборот на нов селектор без притисок од времето, со целосна внимателност што таквата одлука ја бара.
