Францускиот ас Килијан Мбапе доби дозвола од лекарскиот тим да настапи во финалето на Интерконтиненталниот куп на ФИФА, што внесе голем оптимизам во редовите на Реал Мадрид, со оглед дека тимот се соочува со многу повреди оваа сезона.
Според „Марка“, Мбапе целосно закрепнал од повредата на бутниот мускул заработена во натпреварот против Аталанта (2-3) во шестото коло од Лигата на шампионите.
Состојбата на Французинот била детално разгледана од медицинскиот тим и тренерскиот штаб, кои донеле одлука да му дозволат учество на утрешниот натпревар против мексиканскиот тим Пачука.
За да се врати што побрзо, Мбапе ангажирал личен остеопат и физиотерапевт, вложувајќи максимални напори да биде подготвен за финалето.
Постојат големи шанси Мбапе да се најде и во стартниот состав на Реал Мадрид, но конечната одлука ќе биде донесена по завршувањето на последниот тренинг, соопшти Карло Анчелоти.
