Француската ѕвезда Килијан Мбапе нема да има потреба од операција поради скршениот нос, повреда што ја заработи на Европското првенство, тврди „АС“. Според информации од извори блиски до Реал Мадрид, а врз основа на прелиминарните резултати од медицинските прегледи во клубот, состојбата со носот на Мбапе е добра. Независно од тоа, неговата состојба и понатаму ќе се следи преку чести тестови.
Францускиот репрезентативец вчера беше претставен на „Сантијаго Бернабеу“. Тој се здоби со повреда на носот за време на натпреварот меѓу Франција и Австрија, поради што подоцна носеше маска.
Одморот за Французинот ќе трае до 8 август, кога ќе се врати назад во Мадрид. Тој ќе ја пропушти американската турнеја на тимот.
Мбапе е амбициран да игра уште во натпреварот за Суперкупот на Европа против Аталанта на 14 август.
