Килијан Мбапе одлучи да го повлече судскиот процес против ПСЖ за морално вознемирување и обид за уцена, за кои бараше обештетување во висина од 55 милиони евра, само неколку часа пред натпреварот против неговиот поранешен клуб на Светското клупско првенство. Сепак, според „Л’Екип“, тој сè уште продолжува со жалбата пред Судот за труд.
Овој аспект од спорот ги влоши односите меѓу Мбапе и парискиот клуб. Фудбалерот тврди дека постигнал договор да го напушти ПСЖ без никакво обештетување, но клубот не го признал тој договор како важечки.
Случајот со барањето од 55 милиони евра најверојатно ќе треба да се решава пред Судот за труд, кој треба да пресуди во корист на една од двете страни. Во април, Мбапе и неговите адвокати изјавија дека ќе ги искористат сите средства, правни, судски и казнени, за да ја добијат оваа постапка, која започна минатата година, кога ПСЖ не му ја исплати побараната сума во форма на бонуси и плати.
Пред околу еден месец, Парискиот суд за извршување на казни ја укина привремената блокада врз сметките на ПСЖ, што беше побарано од страна на правните застапници на Мбапе. Судот оцени дека нема надлежност да изрече таква мерка и дека друг суд треба да одлучи по тоа прашање. Случајот кој Мбапе го повлече во понеделникот е независен од останатите постапки кои ги води против неговиот поранешен клуб.
Двете страни неодамна се појавија пред суд за да го решат долгот кој ги држи во тензија по заминувањето на Мбапе во Мадрид. Лига 1 и спортските судски органи во Франција донесуваа одлуки во корист на двете страни, што доведе до застој во процесот. Сепак, со оваа одлука на Мбапе, тензиите меѓу него и клубот барем делумно се намалија.
Раководството на Галатасарај испратило понуда вредна 50 милиони евра, плус дополнителни 5 милиони во форма на бонуси за напаѓачот на Наполи, Виктор Осимен. Нигерискиот напаѓач минатата сезона ја мина токму во дресот на турскиот клуб, каде што имаше импресивен ефект, 37 голови и осум асистенции на 41 натпревар.
Осимен има голема желба да остане во Истанбул, но сè ќе зависи од претстојните преговори меѓу Галатасарај и Наполи. Во неговиот договор постои откупна клаузула од 75 милиони евра, па Наполи тешко дека ќе се согласи на трансфер за сума значително пониска од предвидената.
Саудискиот Ал-Хилал и понатаму останува во трката за потписот на Осимен. Азијците се подготвени да ја платат целосната сума и му нудат исклучително атрактивна плата на фудбалерот, но Осимен во оваа фаза од кариерата претпочита да остане во Европа.
Интерес за нигерискиот напаѓач покажуваат и бројни европски гиганти, но целокупниот финансиски пакет за евентуален трансфер е премногу висок за повеќето од нив.
