Ракометната репрезентација на Македонија вечерва од 20.30 часот во Вараждин игра со силната Франција и најверојатно тоа ќе биде последен меч за нашиот национален тим на СП 2025.
Четвртфиналето теоретски уште е дофатливо, но потребни се три чуда од кои две пред да почне мечот со Франција, за да се случи тоа. Затоа, за Македонија најважно е без притисок да се влезе во дуелот и да му се даде што посилен отпор на тимот за кој Кирил Лазаров рече дека е еден од двата најсилни на светот заедно со Данска.
Македонија досега никогаш не ја победила Франција на петте меѓусебни дуели, лани на ЕП во Дизелдорф загубивме со 10 голови разлика.
„Не треба да ги прецениме Французите туку да играме за победа. Ни недостига атмосферата на трибините од првите натпревари, но разбирливо е дека долго е првенството. Многу ни значи поддршката од тие што се тука сè уште и другите што нè поддржуваат пред малите екрани, ни даваат дополнителен мотив за да се бориме уште повеќе и да постигнеме подобри резултати. Очекуваме добар натпревар против Франција, нема да се предадеме“, најави голманот Марко Кизиќ.
