Лионел Меси бил дури трет избор за изведување слободни удари во младиснките категории во Барселона, а како што вели Рожер Жирибе, речиси никогаш и не добивал шанса во Академијата на Каталонците да ги изведува прекините.
„Во Ла Масија имаше двајца подобри изведувачи на слободни удари од него. Прв избор беше Виктор Васкес, а потоа и левоногиот Хуанчо Клауси. Меси речиси никогаш или многу ретко доаѓаше на ред да ги изведува прекините“, вели Жирибе.
Оттогаш до денеска има огромна разлика, а Меси стана еден од најопасните и најпрецизни изведувачи на слободни удари на планетата, со дузина брилијантни голови од прекин.
Но, каде се Васкес и Клауси сега? Виктор одигра само 3 меча зa тимот A на Барселона, а потоа во 2011 година заминa во белгиски Бриж. Играше и во Торонто и за мексикански Круз Азул, а сега игра за Ум Салам во Катар.
Клауси мина уште полошо и не одигра ниту еден меч за Барселона, а потоа играше за клубови од пониските лиги во Шпанија.
