Лионел Меси вчера беше незадржлив и даде три гола во победата од 4:2 на гостувањето кај Севилја. Со овој триумф, Барселона покажа дека не е во криза ниту на резултатски, ниту на голгетерски план. Каталонскиот гигант покажа шампионски карактер и откако на полувремето губеше со 2:1, во вториот дел направи целосен пресврт и ги освои трите бода.
Следен предизвик за шпанскиот првак ќе биде вечното „Ел Класико“ против Реал и тоа во Мадрид. Интересно е што за неколку дена, Барселона два пати ќе гостува на „Сантијаго Бернабеу“, а Меси најавува радост сред Мадрид.
„Против Севилја ја видовте вистинската Барселона, таа која се бори за сите трофеи. Не можам да кажам дека титулата во првенството е освоена, бидејќи има уште многу да се игра. Сега следува гостување во Мадрид. На чекор сме од пласман во финалето на Купот. Знаеме дека нѐ очекува тежок меч, но ние сме убедени дека може да победиме во Мадрид. Дури по мечот во Купот ќе размислиуваме за средбата која нѐ очекува во првенството. Ние атакуваме да ги освоиме трофеите во сите натпреварувања каде што играме“, рече оптимистички Меси.
Реал Мадрид вечерва гостува кај Леванте и со евентуална победа на ова гостување, ќе се врати на девет бода зад Барселона во првенството.
