Екипата на Милан на загревањето пред мечот со Салернитана истрча со маички на кои стоеше поддршка до Симон Кјаер кој се повреди и му претстои подолга пауза, а Росонерите мотивацијата ја пренесоа и на терен, па уште во првите 20 минути го решија победникот.
Милан ја совлада слабата Салернитана со 2-0, и привремено изби на чело на табелата, со два бода плус во однос на Наполи кој треба да игра со Аталанта. Стрелци на головите на „Сан Сиро“ беа Франк Кеси и Алексис Салемакерс во 5-та односно 18-та минута.
За Белгиецот Салемакерс ова е прв гол сезонава, а откако даде гол, прослави со кревање на дресот на Милан со бројот 24 кој го носи Данецот Кјаер. Сега Милан сезонава има дури 14 различни стрелци, во топ 5 лигите подобар од нив е само Челзи за кој 16 различни играчи дадоа гол.
