Италијанскиот калчолигаш Милан активно работи на засилување на тимот пред продолжението на сезоната, а како приоритет се издвојува доведувањето на нов стопер, јавуваат италијанските медиуми.
„Газета дело Спорт“ наведува дека челниците на Росонерите веќе идентификувале неколку потенцијални кандидати за дефанзивната линија, при што главна цел е Ким Мин-Јае, стоперот на Баерн Минхен.
Јужнокорејскиот репрезентативец има богато искуство на највисоко ниво, а италијанската публика добро го памети од периодот во Наполи. Во Серија А остави силен впечаток, што дополнително ја зголемува желбата на Милан да го врати на италијанските терени.
Сепак, преговорите со Баерн нема да бидат едноставни поради финансиските барања на германскиот клуб.
Покрај Ким, Милан разгледува и друга опција, Луиз Фелипе, стопер на шпанскиот прволигаш Рајо Ваљекано. Фелипе се профилира како сигурен дефанзивец, познат по цврстината, правилната поставеност и способноста да игра од задната линија. Неговото име сè почесто се поврзува со враќање во италијанскиот фудбал, каде веќе остави солиден впечаток.
Стручниот штаб смета дека дополнителна конкуренција во одбраната е неопходна за тимот да остане конкурентен до крајот на сезоната. Управата е свесна за предизвиците, но сака да реагира на време и да избегне проблеми во клучниот дел од шампионатот.
Преговорите се во рана фаза, а многу ќе зависи од условите што ќе ги постават Баерн и Рајо Ваљекано.
