Победата на Наполи против Милан од 1-0 значеше дека на седум кола до крајот, лидерот Интер сега има убави седум бода предност пред второпласираниот тим на табелата во Серија А.
Тренерите на Наполи и Милан, Антонио Конте, односно Масимилијано Алегри, истакнаа дека главна цел им е обезбедување место во Лигата на шампионите.
„Оваа победа ни дава голем ентузијазам и самодоверба бидејќи никогаш не смееме да заборавиме дека ако сме на второто место, тоа е благодарение на момците кои ги надоместија сите наши порази оваа сезона. Хојлунд го немаше, а пред тоа Ди Лоренцо, Рахмани, Нерес и Вергара отсуствуваа долго време, а ова се пет играчи кои се речиси сите клучни. Неверојатно е што тимот остана на врвот и покрај сите проблеми. Секој друг тим ќе се распаднеше. Елмас беше клучен играч сезонава додека имавме многу отсутни. Тоа би го рекол и за Мацоки и Беукема. Неизбежно е дека колку повеќе играчи имаме на располагање, толку повеќе опции ќе имаме и толку повеќе ќе можеме да ги ротираме за да ги одржиме сите во форма. Направивме голем чекор кон Лигата на шампионите, што е нашата цел. Ако Милан тврди дека Лигата на шампионите е нивна цел, зошто не може и Наполи? Во Јувентус имаат исти амбиции. Интер заслужува да биде прв на табелата. Го сакаме Скудетото, но треба да бидеме реални, треба да ги добиеме сите мечеви до крај, а Интер да киксира повеќе од еднаш, што делува речиси невозможно“, рече Конте.
Неговиот колега Алегри од Милан изјави дека трката за титулата „не е за Милан“. Интер им бега девет бода, а имаат само шест бода повеќе од Јувентус, кој е петти, и им претстои голема битка за првите четири места кои водат во ЛШ.
