Дуелот на најтрофејните клубови во Италија, Јувентус и Милан, сепак нема да го има посакуваниот ефект. Фановите на Јувентус најавија дека ќе го бојкотираат мечот и нема да патуваат на „Сан Сиро“. Единствената причина за бојкотот е скапите билети за гостинскиот сектор на стадионот во Милано.
До минатата сезона, симпатизерите на Јувентус гостуваа на „Сан Сиро“ за 40 евра по човек, додека сега влезницата е дури 75 евра, што е речиси двојно поскапо.
„Да се гледа Милан – Јувентус од третиот спрат на стадионот за 75 евра е неприфатливо. Тоа е шлаканица за навивачката страст. Не може постојано да крадете од нашите џебови и да бидеме уценувани“, стои во соопштението на навивачите на Јувентус.
Дербито на „Сан Сиро“ ќе се игра на 11-ти ноември, а влезниците се движат по цена од 75 до 435 евра.
