Македонија ќе се обиде во последниот меч од септемврискиот циклус да оствари победа над Романија што би значело и реванширање за поразот од првата средба во овие квалификации. Селекторот Благоја Милевски смета дека фактот што дуелот ќе се игра на Денот на независноста, на националниот празник, нема да претставува притисок за неговите избраници, туку мотив повеќе да се оствари позитивен резултат.
„Нема потреба да има притисок што натпреварот ќе се игра на Денот на независноста на Македонија, тоа може само да биде мотив плус. Што се однесува до противникот, селекцијата на Романија е составена од доста квалитетни репрезентативци. Иако поседуваат индивидуален квалитет, ние не се плашиме од никого и гледаме што можеме ние да сториме на теренот за да обезбедиме позитивен резултат. За разлика од поразот при првата наша средба, сега се наоѓаме во сосема друга ситуација, со променети планови и визија околу тоа како треба да изгледа нашиот национален тим, па така сметам дека нé очекува сосема различен дуел. Не можам да се сложам дека овој меч за нас претставува финале, бидејќи секој натпревар носи посебна тежина, но секако дека во зависност од исходот квалификациите ќе добијат одредена насока за нас“, истакна селекторот Милевски.
Селекторот смета дека секој меч е клучен, без разлика во која фаза се игра, но знаејќи дека групата е изедначена остануваат шансите да се стигне до посакуваното второ место за исчекор кон историски пласман на Мундијалот во Катар идната година.
„Уште ништо не е решено, секако дека овој дуел е клучен, но и секој нареден. Групата е доста изедначена и нормално е да мислиме дека имаме шанси за второто место. Психолошкиот момент секако дека е важен, што се покажа дека е единствен проблем во претходниот дуел против Исланд. Сепак, морам да ги пофалам момците за прикажаното во овие два натпревари, треба да се напомене дека ова ни е прв собир и работиме само неколку дена. Секоја чест за нивната борбеност, јас сметам дека Македонија игра оличен фудбал, со тактичка дисциплина. Секако дека треба да поработиме на психолошките моменти, за кои треба време да се отстранат, но треба да се напомене дека ова е текот и правецот во кој треба да се движиме во иднина“, додаде селекторот.
Натпреварот Македонија – Романија е закажан за утре во 20:45 часот и ќе се одигра на Националната арена „Тодор Проески“ во Скопје.
