Макс Ферстапен би можело да заврши во тимот на Астон Мартин, а вредноста на потенцијалниот договор би можела да достигне неверојатни една милијарда фунти.
Според британските медиуми, Астон Мартин моментално преговара со потенцијални спонзори за финансирање на трансферот. Планот е да се осигураат инвестиции кои би го довеле актуелниот шампион на Формула 1, Макс Ферстапен, во нивниот тим.
Доколку овој договор се реализира, тој би бил најголемиот трансфер во историјата на спортот. Според информациите, Ферстапен не би заработил една милијарда фунти за една сезона, туку за неколку години поминати во тимот. Се претпоставува дека неговата годишна плата би изнесувала околу 200 милиони фунти.
Иако Астон Мартин моментално не е во конкуренција за титулата, тимот има две клучни предности освен финансиите: присуството на Адријан Њуи и фабричкиот мотор од Хонда. Њуи е еден од најдобрите инженери во Формула 1, а Хонда е компанијата која стои зад моторите со кои Ферстапен ги освои сите свои титули.
Таткото на Макс, Јос Ферстапен, смета дека Њуи е клучната фигура која моментално му недостасува на Ред Бул.
„Факт е дека болидот не се подобри откако Њуи го напушти тимот. Надградбите веќе не функционираат како што сите очекуваа. Ред Бул се соочува со голем предизвик во 2025 година“, изјави Јос Ферстапен.
Од 2026 година, Ред Бул започнува нова ера со својот мотор Red Bull Powertrains-Ford, додека Астон Мартин ќе користи фабрички мотор од Хонда.
Астон Мартин не е единствениот тим кој се надева на потписот на Ферстапен. Во 2024 година тој разговараше и со Тото Волф, шефот на Мерцедес.
