На 30 мај 2005 година, беше отворен стадионот кој и денеска важи за еден од најмодерните во Европа, минхенскиот „Алијанц арена“, но екипата на Баерн Минхен својот меч на 15-годишнината од отворањето, против Фортуна, вечерва ќе мора да го игра без публика.
Главната цел поради која беше изграден овој прекрасен објект, беше Мундијалот во 2006 година. Веќе една и пол деценија стадионот е дом на клубовите Баерн и Минхен 1860, кои претходно како домаќини играа на Олимпискиот стадион.
„Алијанц арената“ има 75.000 седишта, неговата изградба чинеше 340 милиони евра, а тој беше и прв стадион кој навечер си ги менува боите на својата надворешност. Така, кога игра Баерн, стадионот е црвен, кога игра Минхен 1860 е син, а кога игра германската репрезентација или бел или во боите на знамето на Германија. Така, според боите може да погодите кој тим ќе игра тој ден.
