Капитенот на фудбалската репрезентација на Србија, Александар Митровиќ, по само една полусезона ќе го напушти Катар и најверојатно ќе се врати во Саудиска Арабија. Митровиќ летоска направи трансфер од Ал-Хилал во Ал-Рајан, но за екипата од Катар настапи на само три натпревари и постигна два гола, а надвор од терените е уште од септември кога се повреди.
Раководството на Ал-Рајан воопшто не е задоволно од него, па сакаат уште во јануари да се ослободат, иако Србинот има договор до 2028 година. Според информациите на арапските медиуми, Ал-Ахли е подготвен да го ангажира и да го врати во првенството на Саудиска Арабија, а преговорите помеѓу двете екипи веќе се во тек.
Митровиќ во својата кариера настапуваше за Партизан, Андерлехт, Њукасл и Фулам, пред да се пресели во Саудиска Арабија, додека во репрезентацијата на Србија е најдобар стрелец во историјата со 63 гола на 104 натпревари.
