Капитенот на хрватската фудбалска репрезентација Лука Модриќ во разговор за шпанските медуми најави дека Коцкестите ќе го дадат последниот атом од силите во обидот да ја победат Аргентина и да стигнат до финалето на Светското првенство.
„Со нетрпение го чекам мечот против Аргентина. Меси е нивниот најдобар фудбалер, ќе биде тешко да го сопреме, но мораме да бидеме подготвени. Ќе дадеме се од себе. Ќе се обидеме да го одиграме најдобриот меч во нашите животи и да стигнеме до финалето“, вели Модриќ, кој додаде дека е непријатно изненаден од тоа што Шпанија испадна уште во осминафиналето.
Хрватот додаде дека на соиграчите од Реал Мадрид им најавувал дека неговата репрезентација може да стигне далеку на Мундијалот и тоа е така затоа што тие во националниот тим никогаш не се предаваат, нешто слично како што правеле и фудбалерите на Реал Мадрид.
„Пред да заминеме на Светското првенство, со соиграчите од Реал Мадрид многу разговаравме и постојано им велев „Внимавајте на Хрватска“, може да ги прашате дека беше така. Никој не веруваше во нас. Може да се каже дека Хрватска е како Реал Мадрид. Во ДНК на Реал Мадрид е секогаш да се бори до крај и никогаш да не се откажува. Истото е и со Хрватска“, е заклучокот на Модриќ.
