Андреј Рубљов не сака да ги трпи санкциите како руски тенисер поради војната во Украина и најави можност да смени државјанство ако ситуацијата се влоши и не му биде дозволено и во иднина да игра на дел од тениските турнири.
Рубљов и останатите руски и белоруски тенисери и тенисерки не настапија на Вимблдон откако британската Влада им забрани да играат на гренслемот во Лондон.
„Што се однесува до настапите на Вимблдон, прифатливо е да се смени спортското државјанство. Тогаш би ми дозволиле да играм. Ако ни биде забрането да играме и на други турнири, тогаш опција е да се смени државјанството. Јас сум спортист што има вложено многу во својата кариера и нормално е дека сум фрустриран. Во Лондон се понудивме да играме во двојки со украински тенисери, но не ни беше дозволено“, изјави Рубљов.
Тој е еден од најдобрите играчи на светот, роден е во Москва пред 24 години и најдобар ранкинг му е петтото место на АТП-листата.
Досега освои 11 АТП-титули, а има играно во четвртфинале на сите гренслем-турнири освен на Вимблдон.
