Македонските кошаркарски прволигаши МЗТ Скопје и ТФТ ги добија своите противници за лигашкиот дел од АБА 2 лигата.
Актуелниот македонски првак МЗТ Скопје, според новиот формат налик на оној од фудбалската Лига на шампиони, успеа да ги избегне најголемите фаворити, Цибона и Морнар.
Тимот од „Јане Сандански“ ќе ја отвори новата сезона на домашен терен против Вршац, а потоа го очекуваат две гостувања, кај Сутјеска и кај Студент. До крајот на регуларниот дел од сезоната, МЗТ дома ќе ги пречека Јахорина, Војводина и Подгорица, а ќе гостува на Златибор и Широки.
ТФТ ќе ја започне сезоната на гостински терен против поранешниот европски првак Цибона, а потоа ќе игра дома против Војводина, Хелиос, Слобода Тузла и Студент. Дополнително, ќе им гостува на Широки и на Борац Бања Лука.
Сезоната започнува на 7 октомври, а пласман во плејофот ќе обезбедат осумте најдобропласирани екипи.
