Фудбалерите на Ајакс минимално со 1:0 го победија Херенвен во првото коло од новото првенство на Холандија и тоа може да е најава дека славниот европски клуб може да има успешна сезона. Пред почетокот на домашното првенство, некогашниот четирикратен европски првак одигра три дуели во квалификациите во Лигата на Европа и победи во сите три меча.
Најпрво со 1:0 и 3:1 ја победуваше Војводина, а потоа во следното коло за ривал го доби Панатинаикос и на гостински терен во Атина, Ајакс победи со 1:0 во третото претколо од второто по ранг натпреварување на УЕФА.
Со победата над Херенвен, Ајакс врза четири победи по ред од стартот на новата сезона, нешто што не се случило во последните 22 години. Во 21 век, Ајакс во нова сезона влегол со четири победи по ред само во 2002 година.
Гигантот од Амстердам минатата сезона немаше многу со што да се пофали и тимот заврши на петтото место во првенството и не освои ниту еден трофеј. Токму затоа тимот направи прмена на тренерската позиција и сега на клупата е 35-годишниот Италијанец Франческо Фариоли.
