Тајрон Лу веќе не е тренер на НБА тимот Кливленд кавалирс. Тој доби отказ од управата на „коњаниците“, откако тимот претрпе шест порази на првите шест меча сезонава. Лу си оди после 128 победи и 83 порази.
Според реакциите на кошаркарите на Кливленд по социјалните мрежи, играчите воопшто не се среќни што управата го смени тренерот со кој за три години имаа три финалиња по ред и една титула. И Леброн Џејмс кој сега е член на ЛА Лејкерс, ја искритикува одлуката и искажа поддршка за Лу.
За привремен тренер, наименуван е досегашниот асистент на Лу, Лери Дру. Во минатата сезона, Дру го водеше тимот додека Лу беше болен, и имаше одлични 9-1, но тогаш во составот го имаа и Леброн Џејмс. Дру има работено како прв тренер во Атланта и Милвоки.
