Рафаел Надал на Грен слемот во Мелбурн тргнува во атак да го надмине Роџер Федерер по бројот на освоени трофеи на четирите најголеми тениски турнири. Шпанецот сигурно е еден од фаворитите за триумф, но во последното интервју кое го даде, Надал вели дека не се чувствува добро и дека му е тешко да се подготви за предизвиците кои започнуваа од утре.
„До пред неколку дена изгледаше дека се е совршено. Имав многу добра предсезона и бев полн со самодоверба. Сепак, во последно време, самодовербата се претвори во проблем. Последните неколку дена патам затоа што не можам да тренирам во интензитетот кој ми е потребен. Ако успеам да се движам како што посакувам, ќе ми се врати и самодовербата“, вели Надал, кој реши и детално да го објасни проблемот.
„Кога сервирам, еден од мускулите не ми дозволува целосно да го завршам движењето како што треба. Го оптоварувам, но не смеам да го правам тоа, бидејќи мускулот може да пукне. На последниот тренинг ми беше подобро, но тоа е далеку од тоа како треба да биде“, дообјасни Шпанецот, кој мечот од првото коло во Мелбурн ќе го игра утре вечер.
