Актуелниот женски фудбалски шампион на Македонија, Љуботен, продолжува да ги засилува своите редови за новото првенство, но и за настапот во квалификациите за женската Лига на шампионите.
Најново засилување за тетовки е најдобриот стрелец од првенството на Колумбија и репрезентативка на оваа јужноамериканска земја, Ингрид Џуит Видал. Таа во Љуботен доаѓа како позајмена фудбалерка од Америка де Кали. Ингрид Видал има 54 настапи за репрезентацијата на Колумбија и 11 гола и се очекува да биде големо засилување за екипата од Тетово. Како што велат од ЖФК Љуботен, ова е најголемиот трансфер во историјата на македонската женска фудбалска лига.
Љуботен последните три сезони е шампион на Македонија, а последните две години успеваше да дојде и до двојната круна, откако го освојуваше Купот на Македонија. Претходно, тетовската екипа се засили и со колумбијките Паула Алехандра Валбуена, Карина Мичел Бермудес, Алехандра Карен Родригес, српската интернационалка Нина Миленковиќ, како и нашите Александра Јовановска од Шкендија, Настасија Накова од ЖФК Скопје и Данче Карпузовска од Вардар.
