Играњето за репрезентацијата на Аргентина и носењето на дресот со националниот грб е најубавото чувство за Мауро Икарди. Тој ова го изјави за време на тренинг-кампот на „гаучосите“, кои се подготвуваат за двете пријателски средби со Мексико, на 17-ти и на 20-ти ноември.
По Мундијалот во Русија, Икарди редовно е повикуван да игра за родната земја. Селекторот Лионел Скалони има доверба во него, а фудбалерот на Интер кажа како се чувствува во улога на репрезентативец.
„Не постои поубаво чувство од носењето на дресот на репрезентацијата. Ниту носењето на клупскиот дрес не е толку моќно како играњето за својата земја, за најубавиот дрес на светот, а тоа е аргентинскиот. Немам зборови со кои можам да опишам. Кога играш за овој дрес и за оваа земја, не може да не дадеш максимум“, кажа Икарди, кој има изливи на љубов кон татковината, откако претходно беше ставан во позадина и во сенка на Агуеро, Игуаин и другите напаѓачи во кои селекторите имаа поголема доверба.
